1. Dasturni loyihalashtirish yondashuvi
O‘quv dasturlari Buxoro davlat universitetida talabalar ehtiyojlari, mehnat bozori talablari va milliy hamda xalqaro malaka ramkalari (NQF, EQF) asosida loyihalashtiriladi. Dastur mazmuni akademik va amaliy bilimlarni uyg‘unlashtirishga qaratilgan.
Yangi o‘quv dasturlarini ishlab chiqish jarayoni
Ta’lim dasturini ishlab chiqishda dastlab ehtiyoj tahlili o‘tkazildi, bunda soha bo‘yicha mintaqaviy va xalqaro mehnat bozori holati chuqur tahlil qilindi. Ushbu tahlil natijalari asosida zamonaviy talablarga javob beradigan kompetensiyalar aniqlandi. Keyinchalik manfaatdor tomonlar — ish beruvchilar, soha mutaxassislari, bitiruvchilar hamda talabalar vakillari bilan maslahatlashuvlar o‘tkazilib, ularning fikr va mulohazalari dastur mazmunini aniqlashtirishda inobatga olindi. Nihoyat, ta’lim dasturi O‘zbekiston Respublikasi Oliy ta’lim vazirligi talablari va milliy malaka talablari bilan uyg‘unlashtirilib, tegishli normativ hujjatlarga muvofiqlashtirildi.
2. Dastur maqsadlari va o‘quv natijalari
Har bir ta’lim dasturi uchun belgilangan malaka talablari bir nechta asosiy tarkibiy qismlarni o‘z ichiga oladi. Avvalo, dastur umumiy maqsadlari aniqlanadi, ular kasbiy tayyorgarlik darajasi, ilmiylikka asoslangan yondashuv, tahliliy fikrlash ko‘nikmalari va ijtimoiy javobgarlik kabi elementlarni qamrab oladi. Ushbu umumiy maqsadlar asosida o‘quv natijalari ishlab chiqiladi; ular bilim, ko‘nikma va kompetensiyalar shaklida ifodalangan hujjatga asoslangan holda shakllantiriladi. Shuningdek, o‘quv natijalari tegishli modullarga bog‘lanadi va har bir modul uchun aniq baholash mezonlari belgilanadi, bu esa o‘quv jarayonining aniqligini va sifatini ta’minlashga xizmat qiladi.
3. O‘quv reja
Ta’lim dasturi zamonaviy talablar asosida tuzilgan bo‘lib, uning strukturasida ECTS kredit tizimiga asoslangan modul yondashuvi qo‘llanilgan. Dastur majburiy fanlar, tanlov fanlari hamda amaliyot bo‘limlarini o‘z ichiga oladi. Bundan tashqari, bakalavriat bosqichida bitiruv malakaviy ishi, magistratura bosqichida esa magistrlik dissertatsiyasi tayyorlash va himoya qilish tartiblari belgilangan.
Har bir ta’lim dasturii uchun alohida qo’llanma shlab chiqilgan bo‘lib, unda quyidagilar aks ettirilgan: modulning mazmuni va o‘quv maqsadi, ta’lim shakli va baholash tartibi, shuningdek, modulning o‘quv natijalari bilan bog‘liqligi. Bu yondashuv talabalarning erishilishi kerak bo‘lgan kompetensiyalarini aniq belgilash va baholash imkonini beradi.
4. Dasturni tasdiqlash tartibi
Yangilangan ta’lim dasturlari tasdiqlashning bosqichma-bosqich tartibiga muvofiq amalga oshiriladi. Dastlab, tegishli kafedra tomonidan dastur loyihasi ishlab chiqiladi. Keyinchalik, ushbu loyiha fakultet o‘quv-uslubiy kengashida muhokama qilinadi va tegishli takliflar bilan boyitiladi. So‘ngra dastur universitet darajasidagi o‘quv-uslubiy kengash tomonidan ko‘rib chiqilib, tasdiqlanadi.
5. Bildirilgan fikr va tavsiyalarni inobatga olish jarayoni.
Ta’lim dasturlarini uzluksiz takomillashtirish jarayonida bir qator manbalar asosida tahlil ishlari olib boriladi. Eng avvalo, talabalar fikri muntazam ravishda so‘rovnomalar va fokus-guruhlar orqali o‘rganiladi, bu esa ta’lim jarayonining bevosita ishtirokchilarining ehtiyoj va takliflarini aniqlash imkonini beradi. Shuningdek, bitiruvchilarning mehnat bozoridagi holati — ish bilan ta’minlanish darajasi va mos ish faoliyati bilan bandlik ko‘rsatkichlari tahlil qilinadi. Bundan tashqari, ish beruvchilarning amaliyotga yo‘naltirilgan taklif va mulohazalari dastur mazmunini yangilashda muhim omil bo‘lib xizmat qiladi. Dasturlarni takomillashtirishda ilgari o‘tkazilgan akkreditatsiya jarayonlarida berilgan tavsiyalar ham inobatga olinadi va zaruriy o‘zgartirishlar kiritiladi.
